Am Freitag isses ma so un ma so bewölkt, uusserdem kimmt nur ganz selten mol e kurzer Schauer vorbei. Die Höschtwerde liege zwische 22 Grad im Norde un 27 Grad do unne im Süde, uff de Wasserkuppe sinds drobbe bloß 19 Grad. Dozu bläst e schwaacher bis middlmäßischer Wind, meist uus Nord.
In de Nacht zum Samsdaach bleibts meistens wenisch bewölkt, vereinzelt kaann sich awer och e bissi Nääwel bilde. Die Temperature sinke runner uff 14 bis 10 Grad.
Am Samsdaach ma so un ma stärker bewölkt, vor allem in de nördliche Hälft immer mo widder e paa Reescheschauer. Im Süde werds noch emol bis zu 27 Grad warm, in Nordhessen 21 bis 24 Grad un obbe uff de Bersch bloß um die 19 Grad. Dazu bläst widder e schwaacher bis middlmäßischer Wind uus Nordwest bis Nord.
In de Nacht zum Sunndaach im Südweschde wenisch Wolke, im Nordooschte ehr stärker bewölkt. Eenzelne Schauer gibts dann och noch. Die Nacht wird 16 bis 12 Grad mild.
Am Sunndaach isses dann größtendeels wolkisch bis stark bewölkt, im Laufe vom Daach komme gebietsweis mol Reescheschauer un Gewidder uff. Lokal kaann's dann sogar e richtig dicke Starkreesche gewwe. In Südhessen gibts aa wenisch mehr Sonneschein un och öfders mol keen Reesche. Die Temperatur klettert bis uff 23 bis 29 Grad, obbe droff uffm Bersch sinds wiedder um die 20 Grad. Dozu e schwaacher bis middlmäßischer Wind uus Nordwest bis Nord.
In de Nacht zum Mondach bleibt’s ma so, ma so bewölkt un die Schauer un Gewidder losse allmählich nooch. Nachts werds widder 16 bis 12 Grad kühl.
In de nei Wooche un generell im Trend bleibts allerdengs kompliziert un schwierig zu saache, wie’s werrergeht. Es bleibt uff jeden Fall wechselhaft – emol sonnich, dann widder Reescheschauer un Gewidder. Do kaann och mol ordentlich Starkreesche dabei sei, lokal sogar Unwedder, gelle. Am Moondach unn Diensdaach werd's wahrscheinlich e bissi kräftischer, da kracht's dann nomma bissi, kraaawwummmmsss! (Stand heut!)
Un dannach? Jo, alles offe, alles dri, alles möglich... entweder wechselhaft irgendwo zwische 20 bis 25 Grad als höchste Temperaturi-Maxima oder widder rischtisch warm bis heiß – des is awer e bissi wenischer wahrscheinlich. Awwer gut, des sehe mer dann ja alles noch... demnächst halt... gelle!